ЁЗГИ ТУРНИРЛАР: «Келажак овози» билимдонлари

“Ўзбекистон маданияти ва санъати форуми” жамғармаси ҳамда “Келажак овози” Ёшлар ташаббуслари маркази томонидан 5 йилдан буён “Ёзги ўқув оромгоҳи” лойиҳаси ташкиллаштирилиб келинади. Жорий йилнинг 7-21 август кунлари Қашқадарё вилояти Шаҳрисабз туманида жойлашган “Лочин” оромгоҳида навбатдаги “Келажак овози-2011” ёзги ўқув оромгоҳи ўтказилди. Унда юртимизнинг барча ҳудудларидан 500 га яқин иқтидорли ёшлар иштирок этишди.

Биз учун қувонарли томони “Келажак овози-2011” ёзги ўқув оромгоҳи доирасида иштирокчилар ўртасида “Заковат” Интеллектуал турнири ҳам ўтказилди. Турнирга Тошкентдан кўрсатув бошловчиси ва муаллифи Абдурасул Абдуллаевнинг таклиф қилиниши ва бевосита мусобақани шахсан ўзлари ўтказганликлари қатнашувчиларда қизиқиш ва иштиёқни бир неча баробар ошишига сабаб бўлди.

Турнирда 18 та жамоа иширок этди. 12 та саволдан 2 та раунд, жами 24 та савол йиғилган билимдонларга тақдим этилди. Ушбу саволларга энг кўп аниқ жавоб қайтарган жамоа якунда ғолиб дея эътироф этилди. Бундай шарафли номга “Дилемма” жамоаси мушарраф бўлди.

Ғолиблар эсдалик совғалари ва сертификат билан тақдирланишди.